KTSC

တၢ်ဒုးအိၣ်ထီၣ်ကညီယွၤဂ့ၢ်ပီညါတၢ်သိၣ်လိလီၢ်ခၢၣ်သး

ပဝဲပှၤကညီတကလုာ်အံၤ ဟဲအိၣ်ဝဲဆိးဝဲဒၣ်လၢ ကီၢ်အမဲရကၤတဘ့ၣ်အံၤအပူၤ အိၣ်ဝဲအါမး န့ၣ်လီၤ. ဖဲ ပအိၣ်လၢကီၢ်ပယီၤမ့ၢ်ဂ့ၤ, ကီၢ်ဆၢမ့ၢ်ဂ့ၤ, ယိၤကီၢ်အပူၤမ့ၢ်ဂ့ၤပအိၣ်ဒီးပတၢ်အိၣ်ဖှိၣ်ဒၣ်ဝဲစုာ်စုာ်အါန့ၢ်အန့ၣ်ပအိၣ် ဒီးပ တၢ်အိၣ်ဖှိၣ်သရၣ်သမါတဖၣ်စ့ၢ်ကီးလီၤ.ဒ်န့ၣ်အသိး, ပဘူၣ်ထီၣ်ဘါထီၣ်ဘၣ်ယွၤလၢပကျိာ်ဒၣ်ပကစၢ်ဝဲန့ၣ်လီၤ.

ဘၣ်ဆၣ်ပဟဲတုၤလၢ ကီၢ်မဲရကၤအပူၤဒီး ပဘူၣ်သကိးဘါသကိးဘၣ်ယွၤလၢ ပှၤကိၤလၤဝါဖိ သ့ၣ် တ ဖၣ် လီၤ. တမ့ၢ်ပကျိာ်ဘၣ်. ပတနၢ်ပၢၢ်အါအါဘၣ်. ဘၣ်ဆၣ်ပဘၣ်ဘူၣ်ဘါသကိးတၢ်ဒီး အဝဲသ့ၣ်လီၤ. လီၤ ဆီ ဒၣ်တၢ် ပတၢ်အိၣ်ဖှိၣ်သရၣ်သမါ, ယွၤအတၢ်မၢဖိသ့ၣ်တဖၣ် အိၣ်စှၤဒီး ပှၤပတီၢ်မုၢ်ဖိ အါဝဲအဃိ ပှၤ လၢ အ ကဲခိၣ်ကဲနၢ်လၢ တၢ်ဘူၣ်တၢ်ဘါတကပၤ စှၤဝဲဒိၣ်မးလီၤ. ပထံၣ်ဘၣ်လၢ ပပှၤကလုာ် သ့ၣ်တဖၣ်ဘၣ် ကွၢ် ဆၢၣ် မဲာ်ဘၣ်ဝဲ တၢ်ကီတၢ်ခဲဒိၣ်ဒိၣ်မုၢ်မုၢ် ခီဖျိနီၢ်သးအဂံၢ်အဘါ စှၤဝဲဒိၣ်မးအဃိ လီၤ.

ဘၣ်ဆၣ်ယွၤဟ့ၣ်ပဝဲ ကညီဖိသ့ၣ်တဖၣ် တၢ်ထံၣ်အသီ ခီဖျိဖုသရၣ်ဒိၣ်သးဂ့ၤ (KBCUSA ပှၤ ပၢၤ လီၢ် ဆ့ၣ် နီၤမၤတ့ၢ်တၢ်) အဃိ လၢယွၤအတၢ်သုးတၢ်ကျဲၤ အဖီလာ်ပအိးထီၣ်န့ၢ်ဘၣ် KBCUSA အလံာ် စီဆှံကၠိ အမံၤမ့ၢ်ဝဲ ကညီယွၤဂ့ၢ်ပီညါ တၢ်သိၣ်လိလီၢ်ခၢၣ်သး (Karen Theological Study Center, KTSC) ဖဲ (၂ဝ၁၅)နံၣ်, လါစဲးပထ့ဘၢၣ် (၈) သီဟါ ဖဲဝ့ၢ် St. Paul, Minnesota န့ၣ်လီၤ.

တၢ်ကွၢ်စိ

၁.မ့ၢ်ဒ်သိးပှၤမၤလိတၢ်ဖိတဖၣ်ကသ့အဲၣ်မၤတၢ်သးခုကစီၣ်
၂.ဒ်သိးပကဒုးအိၣ်ထီၣ်ကညီခိၣ်နၢ်လၢသူၣ်ဂ့ၢ်သးကျိၤဒီးဆီၣ်ထွဲမၤစၢၤကရၢမိၢ်ပှၢ်အတၢ်သးခုကစီၣ်တၢ်ဒိၣ်ထီၣ်ထီ ထီၣ်အဂီၢ်.
၃.ဒ်သိးပပှၤကလုာ်ကညီဖိကသ့ဟံးဃာ်ဂၢၢ်ကျၢၤဘျၢထံခရံာ်ဖိအတၢ်စူၢ်တၢ်နာ်န့ၣ်လီၤ.

တၢ်အိးထီၣ်ကၠိအတၢ်ပညိၣ် မ့ၢ်ဒ်သိးအမဲရကၤ ကညီဘျၢထံခရံာ်ဖိတဖၣ် ကဘၣ်တၢ်ဒုးဒိၣ်ထီၣ် နီၢ် သး အ သဟီၣ်အဂီၢ်, တၢ်လီၢ်လၢ အလိၣ်ဘၣ်ယွၤအတၢ်မၢဖိတဖၣ် ကဒိးန့ၢ်ဘၣ် ပှၤမၤတၢ်သးခုကစီၣ် တ ဖၣ် အ ဂီၢ် န့ၣ်လီၤ. ပတၢ်မၤလိအံၤ အိၣ်ဝဲဒီးအတီၤခံတီၤ ဒ် အမ့ၢ်ဝဲဒၣ် ယွၤဂ့ၢ်ပီညါတၢ်မၤလိ အလံာ်အုၣ်သး (Certificate of Theological Studies (CTS) ဒီးတီၤဒိၣ်လာ်ယွၤဂ့ၢ်ပီညါတၢ်မၤလိ (Diploma in Theology (DT)) တဖၣ် န့ၣ်လီၤ. ကၠိခိၣ်မ့ၢ်ဝဲ သရၣ်မုၣ်ဆံးမုၢ်ရှ့ၣ်ဒီး သရၣ်, သရၣ်မုၣ်သိၣ်လိတၢ်တဖၣ် တစှၤန့ၢ်ဘၣ် တဆံခံဂၤဘၣ်.

ကၠိဖိလၢ အဟဲမၤလိတၢ်အိၣ်ဝဲ (၃၆) ဂၤလီၤ. CTS -၁၃ ဂၤ ဒီး DT- ၂၃ ဂၤန့ၣ်လီၤ. တၢ်မၤလိအံၤ မ့ၢ် ဝဲဆၢကတီၢ်ဖုၣ်တၢ်မၤလိ (Intensive Course) အဃိ ပှၤကၠိဖိတဖၣ် ကဘၣ်မၤလိဝဲ ခံပတီၢ် လၢတၢ်မၤလိနံၣ် တနံၣ်အဂီၢ်န့ၣ်လီၤ. တၢတပတီၢ်န့ၣ် ကဘၣ်မၤလိဝဲ ခံနွံဒီး ဘၣ်ကွဲးပာ်ဖျါထီၣ်လံာ် အိၣ်ဒီး တၢ်ဒိးစဲးဒီး အိၣ်ဝဲဒီးတၢ်မၤလိပျီ (Field Work) သ့ၣ်တဖၣ်လီၤ. DT ကၠိဖိသ့ၣ်တဖၣ် ကဘၣ်ကွဲးပာ်ဖျါထီၣ် တၢ်ကွဲးဃိထံ (Research Paper) မ့ၢ်ဝံၤမး ကဒိးန့ၢ်ဘၣ်လံာ်အုၣ်သး န့ၣ်လီၤ.

ကၠိဖိသ့ၣ်တဖၣ် ဟဲက့ၤမၤလိက့ၤတၢ်မၤလိ ခံတပတီၢ်ဖဲ (၂ဝ၁၆) နံၣ်, လါမၢ်ၡး (၂၆) သီ တုၤ လါ အ့ဖြ့ၣ် (၉) သီဒီး တနံၣ်အဂီၢ် အတၢ်မၤလိဝံၤဝဲဒၣ်လီၤ. ဒ်သိးကဖျိထီၣ် ကၠိတဘျီအံၤအဂီၢ် ကဘၣ်မၤ လိ ဝဲခံနံၣ်အဃိ ဖဲလါစဲးပတ့ဘၢၣ် (၂ဝ၁၆) နံၣ် ဒီးလါမၢ်ၡး (၂ဝ၁၇) နံၣ်န့ၣ် ကဘၣ်ဟဲက့ၤဒီးမၤဝံၤဝဲ အ တၢ် မၤလိန့ၣ်လီၤ. တၢ်ဝဲအံၤ မ့ၢ်ကၠိဖိလၢအမၤလိဝဲ, တၢ်မၤလိနံၣ် (၂ဝ၁၅-၂ဝ၁၇) တဖၣ်အဂီၢ်လီၤ.

၂ဝ၁၆-၂ဝ၁၈ တၢ်မၤလိနံၣ်အဂီၢ် ကၠိဖိအသီတဖၣ် ဆှၢထီၣ်ဝဲလံာ်ပတံဝံၤဝဲ စ့ၢ်ကီးလီၤ. ပှၤခံဖုတဖု အံၤအဂီၢ် စ့ၢ်ကီး တၢ်မၤလိကစးထီၣ် ဖဲ (၂ဝ၁၆) နံၣ်, လါစဲးပတ့ဘၢၣ် (၁၁) သီန့ၣ်လီၤ. ပှၤလၢအဖျိ ထီၣ်လၢ ကညီယွၤဂ့ၢ်ပီညါ တၢ်သိၣ်လိလီၢ်ခၢၣ်သးတဖၣ် ကဘၣ်တၢ်တူၣ်လိာ်အီၤလၢ (KBCUSA) တၢ်အိၣ်ဖှိၣ် တဖၣ်န့ၣ်လီၤ. ဆၢမုၢ်လၢ်လၢ နံၣ်လၢကဟဲဆူညါတဖၣ် ပကၠိတဖျၢၣ်အံၤ ကဒုးအိၣ်ဖျဲၣ်န့ၢ် ယွၤတၢ်မၢဖိ အသီတဖၣ်န့ၣ်လီၤ.

စံးဘျုးဘၣ်ကစၢ်ယွၤ အဘျုးအဖှိၣ် လၢပဝဲ (KBCUSA) အိးထီၣ်ဘၣ်ဝဲ လံာ်စီဆှံကၠိအဃိ န့ၣ်လီၤ. ကိးနံၣ်ဒဲး လါစဲပတ့ဘၢၣ် သၢနွံတနွံ ကမ့ၢ်ဝဲ ပဝဲပှၤကညီယွၤဂ့ၢ်ပီညါတၢ်သိၣ်လိလီၢ်ခၢၣ်သး (KTSC) အမုၢ် နံၤအဃိ ဃ့ကညးဒီး စံးဘျုးဆိဘၣ် (KBCUSA) တၢ်အိၣ်ဖှိၣ်ကိးဖုဒဲးလၢ ကမၤစၢၤဆီၣ်ထွဲ ပကၠိအံၤ လၢတၢ်ထုကဖၣ်, တၢ်မၤဘူၣ်ဒီး တၢ်ဂ့ၢ်ကလုာ်ကလုာ်တဖၣ် အဂီၢ်န့ၣ်လီၤ. စးထီၣ်လၢပကၠိအံၤတၢ်ဒုးအိၣ် ထီၣ်ဝံၤတုၤဆၢကတီၢ်ခဲအံၤပှၤကၠိဖိဖျိထီၣ်ကၠိအိၣ် (၂၄၅)ဂၤ, ဖျိကၠိအိၣ် (၈)ဝီတဝီလံန့ၣ်လီၤ. စးထီၣ် ၂ဝ၂၄နံၣ် ဆူအမဲာ်ညါပနာ်လၢပှၤဖျိကၠိသ့ၣ်တဖၣ်ကအါထီၣ်န့ၣ်ပသမၢအလီၢ်တအိၣ်ဘၣ်.

၁ၡမူၤ ၂း၃ဝ စံးဝဲ, “ပှၤလၢအမၤလၤကပီၤယၤန့ၣ်, ယွၤကမၤလၤကပီၤအီၤ” အသိး မ်ယွၤဆိၣ်ဂ့ၤ ဘၣ် သုဝဲခဲလၢာ် ထူးထူးတီၤတီၤ ခီဖျိလၢ သုတၢ်အဲၣ်ဆီၣ်ထွဲပဝဲ လံာ်စီဆှံကၠိအဃိန့ၣ်တက့ၢ်.